[youtube]http://www.youtube.com/watch?v=JyXT-kL4vu0[/youtube]‘Celda 211’ foi a gran triunfadora dos Goya 2010 con oito premios. Ademais do Goya a mellor actor protagonista (Luis Tosar) e mellor director (Daniel Monzón), ‘Celda 211′ gañou o Goya á mellor película; á actriz de reparto, Marta Etura, e ao actor revelación, Alberto Amman. ‘Ágora’ recolleu sete premios e foi a aparición de Pedro Almodóvar, un dos momentos máis aplaudidos da gala.

Porén, un dos instantes máis vibrantes da noite, foi cando Javier Bardém, gañador dun Óscar en 2008, entregou a un emocionado Luis Tósar, o galardón ao mellor actor protagonista. O actor lucense dedicou o Goya ao novelista Francisco Pérez, a todo o equipo da película e a Malamadre, o gran responsable da súa actuación. Ademais en galego dirixiuse á súa familia e a todos os seus amigos “que desde o Atlántico están facendo unha festa paralela a esta”. Así concluía, entre aplausos, a intervención dun dos actores con máis talento do panorama nacional.

Pero nunha noite con tantos premios e glamour, aínda habería máis tempo para o galego na gala. Emma Lustres, a produtora de Vaca Filmes, responsable do claustrofóbico e carcerario filme que protagoniza Malamadre, tamén utilizou a súa lingua para expresar, visiblemente emocionada, o seu agradecemento polo éxito colleitado pola película, asegurando que “esta noite é moi especial para Galicia, sobre todo para os que fan cine desde alí”.